MATREX
Admin
عدد الرسائل : 114
تاريخ التسجيل : 04/08/2007
 |  موضوع: عريس الغفله .حوار ساخن جداا  الخميس سبتمبر 06, 2007 5:14 am | |
| كنا قاعدين كلنا علي المصطبه وكبايات الشاي السخن عامله جو في القعده ويدوب لسه في اول حجر
بس الكل جاي انهارده مبسوط والمزاج تمام
لكن لاحظت ان المعلم حنفي قاعد ساكت كده من اول القعده مش عارف ماله متغير انهارده قلت اسأله في ايه ودي كانت بدايه الحوار
انا : مالك كده يا معلم حنفي مزاجك مش معدول ليه
سيد افندي : اه صحيح مالك كده يا معلم شايل طاجن ستك ياراجل فك دي القعده حلوه وساعه الحظ متتعوضش
المعلم حنفي : والله يا جماعه موضوع حصل انهارده وشاغلني شويه متشغلوش بالكم انتم ماترصلنا حجر كمان يا محمد يا مصري
انا : ياعم حجر ايه بس ما ده لسه شغال اهو احكيلنا بس في ايه مزعلك يمكن نقدر نساعدك
تيتو : اه صحيح يا معلم ما تقول
المعلم حنفي : انت بالذات ياد تسكت خالص احسن انا مفقوع منك
رمزي بيه : يا جماعه اهدوا شويه عيب كده يا معلم حنفي ده مش اسلوب تتكلم بيه خليك راجل اسبور وشيك في كلامك
المعلم حنفي : شيك ؟؟ !! هع هع انت مش شايف الواد ومياصته وايه ياد اللي انت لابسه في ايدك ده
انا : يا معلم حنفي عيب ميصحش ده الراجل ضيف واحنا كلنا جايين ننبسط وندردش بعيد عن وجع القلب والدماغ بتاع العالم الي بره قول يا معلم بس مالك ده انت شكلك حكايتك حكايه
المعلم حنفي : مش حقول حاجه الا اما اعرف الواد ده لابس ايه في ايده البتاعه ام شخاليل دي
انا : دي اسمها حظاظه يا معلم حنفي ها عرفت يا سيدي خلصنا بقي نشفت ريقنا
المعلم حنفي : نهايته .. الموضوع ومافيه يا اخوانا ان بنتي الكبيره جالها عريس
انا : ودهي حاجه تزعل يا معلم الف مبروك ياراجل وربنا يتمم بالخير
رمزي بيه : ده يوم سعد والله يا معلم الف مبروك
تيتو : الف مبروك يا معلم وحياتك عندي لارقصلك في الفرح والدي جي علي حسابي كمان
المعلم حنفي : ايه الدي جي ده دي حلويات دي ولا ايه ؟
سيد افندي ( حيموت علي نفسه من الضحك ) : هههههههه ده كلام يا معلم بقي مش عارف الدي جي ده يا سيدي حاجه كده زي تسجيل كبير وسمعاته كبيره وصوتها عالي علشان الاغاني اللي حتشتغل في الفرح الف مبروك يا معلم
المعلم حنفي : الله يبارك فيكم يرجاله عقبال عندك جميعاً
سيد افندي : وبالمناسبه دي حسمعكم قصيده جديده استلهمتها من الموقف حالاً
انا : ( بحاول الطف الجو شويه ) : قول يا سيد افندي سمعنا يا سيد سمعنا متعنا بخطبك متعنا
الكل طبعاً قعد يضحك الا سيد افندي اللي خدته الجلاله اوي وانطلق في تلاوه القصيده وكانت بتقول
جانا الخبر جانا والدنيا مش سايعانا
يوم فرح بنتنا يوم فرح من جوانا
عريس شياكه وخفه
مظبوط اوي في الزفه
وعروسه حلوه جميله
جمال وحسب واصيله
يا حنفي يابو العروسه
يابو الرجال علي حق
الجدعنه من شيمتك
والمرجله علي حق
واستمر سيد افندي في اسماعنا القصيده اكتر من ساعه وكلنا متكيفين اوي وفي الاخر قعدنا نهلل كلنا
اييييييييييه قشطه عليك ياسيد افندي يا مكيفه نياااااااههههههههههههههههه
وقعدنا طبعاً نبارك للمعلم حنفي ونتمناله ربنا يتتملله فرحه علي خير لكن برده الراجل قاعد مش مبسوط
انا : مالك كده ييا معلم حنفي هي العروسه مش موافقه ولا ايه
المعلم حنفي : لالالالالالالا انا معنديش بنات تقول لا
رمزي بيه : ازاي الكلام ده يا معلم ده هي اللي حتتجوز ولازم يكون في حب او اعجاب علي الاقل وقبول من الطرفين
المعلم حنفي : كلام ايه اللي بتقوله ده يا رمزي بيه حب ايه وكلام فارغ ايه اللي بتتكلم عنه ماتقول حاجه يا محمد يا مصري
انا : يا جماعهه محصلش حاجه ده الراجل بيقول وجهه نظره وبعدين ده النبي اللي قالي كده مش احنا
تيتو : قوله يا مصري الراجل ابو مخ حجري ده عاوز يجوز البنت غصب عنها
سيد افندي : لالالالالالالالا يا معلم حنفي انا مش معاك لازم البنت تشوفه وتوافق عليه
المعلم حنفي : مش لما اوافق انا الاول يا جدعان
انا : ( كنت مستغرب اوي ) وايه اللي مش مخليك توافق يا معلم هو الواد في عيب ولا حاجه
المعلم حنفي : مش عارف كده مش مرتاحله شاب مش مظبوط كده ولا بسلي بنطلون محزق وفانله حتتفرتك من علي جسمه
تيتو : وماله يا معلم ماهي الموضه كده
المعلم حنفي : قلتلك ياد انت بالذات تخرس خالص محدش طلب منك تتكلم
انا : ( بحاول الطف الجو ) يا معلم حنفي بس ده مش سبب علشان ترفض طالما الواد ظروفه كويسه وشاريك انت وبنتك مفيش مانع
رمزي بيه : طب يا معلم حنفي هو حالته الماديه ايه
المعلم حنفي : علي قده هو شكله كده تقول عليه مريش بس لما اتكلمت معاه معجبنيش الحال لا وظيفه حكومه ولا ورث ولا ارض يزرعها ولا حتي محل حلاقه
سيد افندي : لالالالا يا معلم حنفي سيبك من الواد ده خالص الوظيفه الحكوميه هي الاساس متبهدلش بنتك معاه
رمزي بيه : وانا كمان رايي كده ده مفلس باين عليه لازم اللي يتجوز ده يبقي علي الاقل عنده شقه جاهزه في مكان كويس وعربيه منصحكش يا معلم بالجوازه دي
انا : يا جماعه مش كده الكلام بالعقل حلو وهو الراجل حيجيب منين ما ظروف البلد انتوا عارفينها كويس لما كل واحد حيجيب شقه في حته كويسه وحيركب عربيه امال مين حيسكن في شبرا ومصر القديمه ومين حريكب اتوبيس وميكروباص
المعلم حنفي : والله انا محتار مش عارف اعمل ايه اوافق ولا لا
رمزي بيه : متوافقش طبعاً ده مفلس
سيد افندي : لا طبعا متوافقش يا معلم طالما مش موظف حكومه
تيتو : والله يا معلم لو شاب امور واستايل مفيش مانع هو انت حتعوز ايه تاني
انا : والله يا معلم انا شايف انك تاخد راي بنتك في الموضوع ولو وافقت ولو انت شايف ان الواد ليه مستقبل وطيب وابن ناس واخلاقه كويسه مفيش مانه يبدأوا حياتهم مع بعض وبرده متقرصش عليه في الطلبات ده لسه طري وبكره الفقير يبقي غني وانت واجب عليك تقف جنبه يا معلم دي بنتك برده وعريسها يبقي زي ابنك
7
7
7
7
وانت كمان ايه رايك في كلام النس دي وياتري انت مع مين فيهم ؟؟؟؟ | |
|
